追加工程收費公唔公平？一文拆解「臨時加錢」邏輯

裝修做緊做到一半，師傅突然話：「呢個要加錢做多樣嘢喎。」好多業主聽到「追加工程」四隻字都即刻起疑心——係咪搵位加價？係咪當我唔識？但其實，追加工程本身並唔等於「呃錢」，真正問題係資訊不對稱、溝通唔清楚、報價單不夠透明。作為設計師，我地每日都處理追加項目，當中有合理、有必要、亦有可以預防的情況。今次就帶你拆解「臨時加錢」背後嘅四大邏輯，等你下次遇到唔會再一頭霧水。

工程現場有變化：真係臨場先知要加做
有啲追加收費係現場打開先發現問題，例如：

• 打開牆磚先知入面喉管老化；
• 起櫃先發現牆唔直，櫃要加墊板補位；
• 原本預計喉管可沿牆走，發現有橫樑阻住。

呢啲情況施工前未必察覺，追加收費其實係因應實際狀況調整，而唔係刻意加碼。
✅ 應對方法：要求師傅影相解釋，加返清楚收費項目及內容落單據，再決定接唔接受。

更改設計或要求：業主主動改就要有成本反映
裝修期間最常見嘅追加收費，其實係來自業主改主意：

• 原本做木門，想改做玻璃門；
• 書櫃由2米改到做到頂；
• 想加多一組LED燈槽。

任何人手、時間、材料改動都涉及額外成本，設計師／師傅跟返你改動去收費，本身係合理做法。
✅ 應對方法：確認變更前問清楚加幾多、改啲咩、有冇原有工程可以扣返，成個預算先控制得到。

報價單唔夠詳細：含糊位容易變灰色地帶
「裝吊櫃 $5,000」——吊幾高？幾多尺？包唔包門鉸、LED燈？
報價單唔詳細，雙方理解唔同，就好容易因「解讀唔同」引致追加。其實唔係邊方出錯，只係溝通唔夠清楚。

✅ 應對方法：報價單要求列明尺寸、用料、品牌、範圍，最少每項都講清楚做幾多、有冇包收邊／安裝／搬運。

某啲師傅真係會「報平先接單」再慢慢追加
呢個係最唔想承認但又存在嘅現實。有啲師傅或公司會刻意報得好平吸引你簽約，但每做一樣就加一樣，最後總價甚至比其他公司更高。尤其係「只寫一筆總價」但冇明細，最容易出事。

✅ 應對方法：比較報價時唔好淨睇總價，要睇細節位列得清唔清楚。有經驗嘅設計師會主動提醒你邊啲位可能將來會有變動，預先做風險控管。

唔怕追加，最怕係唔知追加咗啲乜
追加工程唔一定係壞事，有時反而係發現問題、及早補救嘅方法；又或者係你生活上新需要嘅體現。關鍵唔係收唔收費，而係有冇清楚說明、雙方認同、價值對等。下次聽到「要加錢喎」，唔洗即刻火滾，反而可以冷靜問一句：「可唔可以寫清楚比我睇？」識問，就唔怕蝕底。